المشاركة الأصلية كتبت بواسطة عزيز

بيض الله وجه من هو حافظ حق الأخوّه
في زمان ماحفظ به راعي الذمه وديعه
مايخون الخوه إلا واحد مابه مروّه
ما تقيده السلوم ولا تقيده الشريعه
ذا رفيق مايسرك لو سقاك دلال ضوه
كل يوم له رفيق يشتري فيه ويبيعه
أبتعد عنه وخله لاتخيل بروق نوه
لو زمى سيله وزبّد ماتبارك به ربيعه
ياهني منهو يصد ولادرى بكثره وشوه
يدعس الدنيا برجله من رفيعه في رفيعه
دام به حيلٍ يشله زاد رفعته وسموه
لين يلقى له مكانٍ فوق خلق الله جميعه
مستقر فيه يمشي شايخٍ بارضه وجوه
لو رفع بيده عصاته جاته الدنيا مطيعه
إن عطى يعطي مروه وإن خذا ياخذ بقوه
وإن عوى ذيبان يربض كل ذيب وسط ريعه
واثق في كل خطوه مالتفت خلفه وتوه
لو بغا مليون سكه ماتضيق به الوسيعه
ول ياوقت تغير وانقلب حدره علوه
قلب قلوب الأوادم والحق الطيب هزيعه
كم خويٍ شفت خيره كم خويٍ شفت سوه
كم مكانٍ شفت فيه هنا وصل وهنا قطيعه
كم رفيق لو نشدته عن مواجيب الاخوه
ماعرف هي من سلومه او قوانين الطبيعه